|
Dagaal geystay khasaare isugu jira dhimasho iyo dhaawac ayaa saakay ka billowday
deegaanka Muudaale oo 40 km u jira degmada Baardheere ee gobolka Gedo.
Dagaalka oo dhex maraya ciidamada DKMG ah iyo kuwa Kenya oo isku dhinac ah iyo
maleeshiyada al-Shabaab ayaa la sheegay in uu billowday kaddib markii ciidamada
huwanta ay weerar ku qaadeen halkaasi.
Dagaalka oo wali socda ayaa la sheegayaa in ay qeyb ka yihiin diyaaradaha
dagaalka ee dalka Kenya kuwaas oo duqeyn xooggan ka wada deegaankaasi sida ay
Bar-kulan u sheegeen dad goob-joogayaal ah.
Wararka laga helayo deegaannada ku dhow dhow halka uu dagaalku ka socdo ayaa
sheegaya in uu dagaalku yahay mid culus.
Xildhibaan Maxamuud Sayid Aadan oo ka mid ah mas’uuliyiinta dowladda Soomaaliya
ee howlgallada ka dhanka ah al-Shabaab ka wada gobolka Gedo ayaa Bar-kulan u
sheegay in ay dileen 40 ka mid ah maleeshiyada al-Shabaab.
Wuxuu sheegay in dhinacooda dagaalka uu uga dhintay hal askari, shan kale ay uga
dhaawacantay.
Ciidamada milateriga Kenya ayaa waxay Soomaaliya ka joogaan gobollada Gedo iyo
Jubbada Hoose.
Degmada Baardheere waxaa gacanta ku haysa al-Shabaab, iyadoo toddobaadkii u
dambeeyay halkaasi ay ku sugnaayeen afhayeenka al-Shabaab, Cali Maxamuud Raage
(Cali Dheere) iyo horjoogayaal kale oo ka tirsan kooxda al-Shabaab.
HOME
|
