|
Saraakiisha sir-doonka ee dalka Mareykanka ayaa ku guda jira baaritaan lagu
xaqiijinayo warbixinnada sheegaya in Cumar Xamaami oo loo yaqaan Abuu Mansuur
al-Amriiki oo ah nin haysta dhalashada dalka Mareykanka kana tirsan ururka al-Qaacidda
ee Soomaaliya in dhowaan la dilay.
Warbixinno aan la xaqiijin oo laga soo xigtay saxaafadda gudaha ee Soomaaliya
ayaa sheegaya in al-Amriiki qoorta laga jaray, kaddib markii amar ka yimid mid
ka mid ah horjoogayaasha maleeshiyada al-Shabaab ee dhowaan ku biirtay
shabakadda al-Qaacidda.
Sarkaal ka tirsan sir-doonka dalka Mareykanka ayaa u sheegay Fox News TV in
haddii ay run tahay in la dilay Abuu Mansuur al-Amriiki ay isbeddel ku keenayso
carbiska kooxda al-Shabaab ee dhallinyarada Mareykanka iyo waddamada reer
galbeedka, iyadoo la ogyahay in al-Amriiki uu door muhiim ah ka ciyaari jiray
soo jiidashada dadka qurba joogta ah.
Sarkaalka ayaa intaas raaciyay in wararka sheegaya dilka Cumar Xamaami inay
dhinac walba ka eegayaan, inkastoo uu tilmaamay in aysan weli u suurta gelin
inay xaqiijiyaan warbixintaas.
Warbixinno laga soo xigtay warbaahinta Soomaalida ayaa sheegaysa in horjoogaha
maleeshiyada al-Shabaab Axmed Godane uu amar ku bixiyay dilka Abuu Mansuur al-Amriiki,
kaddib markii uu dhowaan sheegay in qaar ka mid ah horjoogayaasha al-Shabaab uu
naftiisa uga baqayo.
HOME
|
