Ciidanka ammaanka Kismaayo oo xiray saddex ka tirsan amniyaatka al-Shabaab

Bar-Kulan

February 19, 2012 Markacadeey

Ciidamada ammaanka ee magaalada Kismaayo ayaa sheegay inay xalay xireen saddex nin oo hubeysan oo ay ku eedeeyeen inay ka tirsan yihiin garabka amniyaatka ee maleeshiyada al-Shabaab.

Taliyaha ammaanka ee maamulka ku-meel-gaarka ah ee Kismaayo Maxamuud Qaalib ayaa Bar-kulan u sheegay in saddexda nin lagu soo qabtay howlgal ciidanka ay ka sameeyeen guri ku yaalla xaafadda Guul-wade ee magaalada Kismaayo.

Qaalib wuxuu sheegay in howlgalka uu dhacay kaddib markii qaar ka tirsan dadka deegaanka ay ku soo wargeliyeen ciidanka in guriga ay ku jiraan rag ay uga shakiyeen inay xubno ka yihiin maleeshiyada al-Shabaab.

Wuxuu intaas raaciyay in ragga la soo xiray ay ku hubaysnaayeen bastoolado markii la soo qabtay, isagoo ku eedeeyay inay door firfircoon kaga jireen falal ammaan darro ah oo magaalada ka dhacay.

Howlgalka lagu soo qabqabtay saddexda nin ayaa ka dambeeyay kaddib markii magalada shalay lagu dilay askari ka tirsanaa ciidanka ammaanka.

HOME