|
HRW: Hala rido eedaha siyaasadeysan ee loo haysto Koronto
Bar-Kulan
January 30, 2012 Markacadeey
|
Hay’adda u doodda xuquuqda aadanaha ee
Human Rights Watch ayaa hadal ay maanta soo saartay waxay
ugu baaqday madaxda dowladda Soomaaliya in la rido eedaha
siyaasadeysan ee loo haysto shan qof oo ay ku jiraan weriye
iyo haweeney sheegtay inay kufsi u geysteen ciidanka
dowladda Soomaaliya.
Xeer ilaaliyaha guud ee qaranka
Cabdiqaadir Maxamed Muuse ayaa Isniintii maxkamad ku taalla
Muqdisho ka hor sheegay in dacwadda loo haysto
eedeysanayaasha ay tahay mid culus.
Cabdiqaadir ayaa
eedaha loo haysto shanta qof ee xiran ku tilmaamay inay
isugu jiraan af-lagaaddo loo geystay waax ka tirsan
dowladda, caddayn aan jirin iyo eedo kale. Dhageysiga
dacwaddooda ayaa mar kale loo ballansan yahay 2-da February.
Daniel Bekele, agaasimaha Afrika u qaabilsan hay’adda Human
Rights Watch ayaa sheegay in eedaha lagu soo oogay
haweeneyda sheegtay in la kufsaday ay ka dhigan yihiin
inaanay dowladdu diyaar u ahayn ku dhaqanka tiirarka ay
saldhigga ka dhigatay.
Bekele wuxuu dhaliilay baaritaanka
boolisku ay ku sameeyeen arrintan – oo uu ku tilmamay inu
ahaa isku day siyaasadeysan oo lagu eedeynayo laguna
aamusinayo kuwa tebiya tacaddiyada ay geystaan ciidanka
ammaanka ee ka dhanka ah dumarka Soomaaliyeed.
Xeer
ilaaliyaha guud ayaa ku eedeeyay weriye Cabdicasiis
Cabdinuur Ibraahim inuu aflagaaddeeyay waax ka tirsan
dowladda iyo inuu haween ku qalqaaliyay inay bixiso caddayn
aan jirin.
Haddii loo cuskado xeer ciqaabta
Soomaaliya, wuxuu weriyahan muteysan karaa ilaa lix sano oo
xabsi ah.
Luul Cali Xasan oo ah haweeneyda sheegtay
in la kufsaday waxaa lagu eedeeyay inay aflagaaddeysay waax
ka tirsan dowladda, iyadoo iska dhigtay in la kufsaday,
eed-na u jeedisay booliska. Waxay muteysan kartaa ilaa 9
sano oo xabsi ah.
Saddexda qof ee kale oo uu ku jiro
seyga Luul ayaa loo haystaa inay gacan ka geysteen warka ku
saabsan kufsiga iyo inay ka dhuunteen baaritaanka, waxayna
muteysan karaan min shan sano oo xarig ah.
Booliska
ayaa ku eedeeyay weriye Cabdicasiis Cabdinuur Koronto inuu
ku lug lahaa tebinta warka kufsiga la xiriira oo lagu
daabacay bogga telefishinka Al-Jazeera, hase yeeshee
Al-Jazeera way beenisay eedeyntaas.
Weriye Koronto
wuxuu ku xiran yahay xabsiga dhexe ee magaalada Muqdisho.
Soomaaliya waxay xubin ka tahay heshiiska caalamiga ah
ee ilaalinta xuquuqda shacabka iyo siyaasadda.
Madaxweynaha Soomaaliya, Xasan Sheekh Maxamuud, wuxuu
toddobaadkan ku sugan yahay Brussels si uu kulamo ula qaato
Catherine Ashton, wakiilka arrimaha dibadda u qaabilsan
Midowga Yurub, guddoomiyaha Guddiga Yurub, iyo guddoomiyaha
Golaha Midowga Yurub iyo wasiirrada arrimaha dibadda ee
dalalka xubnaha ka ah Midowga Yurub iyo xubno ka tirsan
guddiga horumarinta u qaabilsan baarlamaanka Yurub.
Daniel Bekele, agaasimaha Afrika u qaabilsan hay’adda Human
Rights Watch ayaa ugu baaqay dalalka deeqaha ku bixiya
dhismaha ciidanka booliska iyo nidaamka caddaaladda
Soomaaliya inay u caddeeyaan dowladda Soomaaliya inaaneyn
lacag ku bixin karin nidaam caddaalad darro sameynaya.
HOME
|
|
|
|
