Ururada siyaasadda Puntland oo saxeexay xeerka & habdhaqanka anshaxa ururada siyaasadda

Allpuntland

January 31, 2012 Markacadeey

Xeerka habdhaqanka anshaxa ururada siyaasada Puntland ayaa maanta waxaa qalinka ku duugay oo saxeexay lixda Urur siyaasadeed Puntland oo kala ah Horseed, Midnimo, Wadajir, Udad, Horucad, PDP, waxaana kulankan oo lagu qabtay xarunta PDRC joogay inta badan gudoomiyeyaasha ururadan oo uu ka mid yahay madaxweyne cabdiraxmaan Maxamed Faroole oo gudmiye u ah ururka Horseed & wakiilo matalaya gudomiyeyaasha KMG ah ururada.

Gudoomiyaha guddiga doorashooyinka Puntland Maxamed Xasan Barre ayaa ugu horayn faahfaahin ka bixiyey ujeedada kulankan, isagoo sheegay in guddiga doorashu ay diyaariyeen xeerkan si hawsha u noqoto mid hanaan wanaagsan ku socota, wuxuuna masuuliyiinta ururada siyaasadda Puntland uga mahad celiyey ka soo qayb-galkooda.

Cabdirisaaq Shoole oo ka mid ah guddiga doorashooyinka Puntland ayaa madasha ka akhriyey qodobada uu ka koobanyahay xeerkani,waxaana ka mid ah ama ugu muhiimsan qaabka ay u dhacayso isdawangelinta taageerayaasha ururada siyaasadda oo ku eg 9, February, & in ururadu is ixtiramaan ayna u siman yihiin sharciga, inaysan wax huba qaadan karin taageerayaasha ururada siyaasadda & arimo kele.

Cabdiraxmaan Cabdulle Shuuke agaasimaha haya'adda Cilmi baarista ee Puntland ee (PDRC) oo isna munaasibadan ka hadlay ayaa ku dheeraaday jidkii loo soo maray in Puntland yeelato axsaaba & Dastuur rasmiya,wuxuuna ku tilmaamay guul in 14-sanno ka dib ay hirgasho,ururada siyaasadda ayuu ugu u jeediyey inay dulqaad muujiyaan ayna ka dheeraadaan in la qabiileeyo ururada siyaasadda madaama laga gudbay hanaankii wax ku qaybsiga qabiilka.

Intaan la saxeexin xeerkan ayaa waxaa su'aalo ay ka qabaan qaabka loo diyaariyey xeerkan jeediyey masuuliyiin ka tirsan ururada siyaasadda ayna ka mid yihiin Midnimo & Udad.

Dr Saadiq Eenow gudoomiyaha Midnimo ayaa guddiga doorasha ka codsaday inay dhex u noqdaan ururada siyaasadda,ayna ka dhabeeyaan himiladii loo asaasay ee ay u balanqadeen shacaka reer Puntland si loo gaaro buu yiri miro-dhal-na ay u noqto hananka Puntland uga gudbayso nidaamkii hore.

Gudoomiyaha urur siyaasadedka Udad Siciid Sanweyne ayaa isna talooyin kuwan la mid ah soo jeediyey & qodobo uu sheegay inay guddiga doorashda u gudbiyeen oo uu xusay inaysan ka dhex muuqan xeerkan,balse waxaa arimahan uga jaawabay xubno ka tirsan guddiga doorashooyinka KMG ah Puntland.

HOME