Sarkaal ka tirsanaa hay’adaha Un-ka, kuna xirnaa magaalada Jowhar, xarunta gobolka Shabeelaha dhexe ayaa la sii daayay.

Wararka ayaa sheegaya in sii deynta sarkaalkan oo xabsi Jowhar ku yaala ku xirnaa ay timid, kadib markii wada hadal ay yeesheen madaxda maxaakiimta iyo madax UN-ka ka tirsan.

C/raxiim Ciise Cadoow, madaxa howl howl galada maxaakiimta ayaa sheegay in ay wada hadal la soo sameeyeen madaxda UNOPS, kaasi oo ku saabsan, sidii mas’uulkan loo sii deyn lahaa.

“Waxay balan qaadeen in ay joojinayaan howlihii maamul u sameynta gobolka Shabeelaha dhexe, anagana waan aqbalnay in sii deyno mas’uulka aan sii deyno” ayuu yiri C/raxiim Ciise.

Hay’ada UNOPS ayaa waday dadaalo maamul ay ugu sameyneysay gobolka Shabeelaha dhexe, iyada oo dowlada federaalkana kala shaqeyneysay maamul u sameynta.

Maxamed Cali Maxamuud (Madka)
Xafiiska Markacadeey Muqdisho