|
In ka badan 20 dukaan oo ay leeyihiin ganacsato Soomaaliyeed oo ku yaalla
magaalada Cape-town ayaa shalay laga rartay alaabooyin aan tayadoodu
wanaagsaneyn oo yiilay dukaamadaasi, kaddib markii howlgallo ay ku qaadeen waax
ka tirsan dowladda hoose iyo boolika dalka Koonfur Afrika.
Qaar ka mid ah ganacsatada Soomaalida ee uu howlgalkaasi saameeyay ayaa ku
dooday in alaabtooda qaar ka mid ah ay tayo ahaan wanaagsaneyd, isla markaana ay
shaqaalaha dowladda hoose rerteen iyagoo aan hubin.
Guddoomiyaha Jaaliyadda Soomaalida ee gobolka Western Cape ee waddanka Koonfur
Afrika Cabdi Jidow ayaa Bar-kulan u sheegay in baaritaannada lagu qaado alaabaha
Soomaalida ay yihiin kuwa soo noq noqda, wuxuuna sheegay in howlgalkan uu yahay
kii ugu ballaarnaa muddooyinkan.
Howlgalkan ayaa saameeyay 50 dukaan oo ay leeyihiin ganacsato Ethiopian ah,
waxaana laga rartay alaabihii yiilay, kuwaasi oo dhammaantood ahaa alaabo aan
tayadoodu fiicneyn, dukaamada alaabooyinka laga rartay waxay ku yaallaan
xaafadda ay Soomaalida ka deggan tahay ee Bellevilla ee magaalada Cape-town.
Si kastaba, howlgalkan oo dhowr jeer soo noq noqday ayaa la sheegay in ay sabab
u yihiin ganacsatada Soomaalida iyo kuwa Ethiopia oo ka madax adeegay in ay
joojiyaan gedista alaabaha tayadoodu ay liidato oo ay ka mid yihiin dhar ay
sameeyaan shirkadaha Nike, Adidas iyo Puma.
HOME
|
