|
Agaasimaha guud ee hay’adda Q.M u qaabilsan dhinaca waxbarashada ee UNESCO
haweenayda la yiraahdo, Irina Bokova oo saxaafadda la hadashay ayaa ka dalbatay
maamulada Soomaaliya oo ay ugu horeyso dawlada KMG ee Soomaaliya inay ka
shaqeeyaan sidii cadaaladda loo hor keeni shaqsiyaadka ka dambeeya dilalka
Soomaaliya loogu geysto wariyaasha Soomaaliyeed.
Irina Bokova waxaa ay hadalkeeda ku sheegtay in saxafiyiinta Soomaaliyeed ay
yihiin isha laga helo wararka sugan ee Soomaaliya waxaana ay dalbanaysaa in deg
deg baaritaano loogu sameeyo cidda ka dambeysa dilalka wariyaasha oo uu ugu
dambeeyay dilkii bilawgii bishaan magaalada Gaalkacyo loogu geystay Allaha u
Naxariistee Farxaan Jeemis C/lle oo u shaqeynayay Idaacadda Daljir qeybteeda G/kacyo.
“Dadaal kasta oo lagu heli karo cidda ka dambeysa dilalka wariyaasha waan ka
qeyb qaadanaynaa muhiimaduse waxay tahay in la helo cidda ay saxafiyiinu bar
tilmaameedka u yihiin” ayay agaasimaha guud ee hay’adda UNESCO Irina Bokova oo
intaa ku dartay inay aad uga naxday dilalal wariyaasha Soomaaliyeed loo gaystay.
“Saxafiyiintu waa kuwa u hadla dadka aan codka laheyn marka waa in la bad
baadshaa cid kasta oo waxyeelaysana laga qabtaa waana inay u shaqeeyaan si madax
banana iyagoo aan wax cabsi ah dareemeyn” ayay sidoo kale tiri haweenayda
madaxda ka ah laanta Q,M u qaabilsan dhinaca waxbarashada ee UNESCO.
Lixdii bilood ee lasoo dhaafay Soomaaliya waxaa lagu dilay illaa iyo 6 wariye
kuwa kalena lagu dhaawacay, Soomaaliyana waxay ka mid tahay wadamada lagu
bartilaameysto saxafiyiinta warbaahinta madaxa banaan ka shaqeeya.
HOME
|
