|
Maamulka Galmudug ayaa sheegay in deegaanno hoostaga Magaalada Gaalkacyo ee
Xarunta gobolka Mudug ay gacanta ku dhigeen Ciidamo ka tirsan Al Shabaab oo ay
sheegeen inay si aad ah u hubeysan yihiin.
Wasiirka Arrimaha gudaha iyo amniga ee Maamulka Galmudug Abshir Diini Cawaale oo
maanta Waraysi siinayay Idaacadda Shabelle ayaa waxa uu sheegay in Tuulada
Bud-bud oo ka tirsan gobolka Mudug ay la wareegeen Ciidamo ka tirsan Al Shabaab
oo si aad ah u hubaysan kuwaasi oo uu tilmaamay inay ka yimadeen qeybo ka mid ah
gobolada dhexe ee dalka Soomaaliya.
Wasiirka ayaa sheegay in Ciidamadaasi ay hogaaminayaan Saraakiil ka tirsan
Kooxda Al Shabaab islamarkaan ay wataan gawaarida dagaalka, wuxuuna xusay in
Maamulka Galmudug uu wado qorshayaal lagu doonayo in lagu weeraro deegaanno
hoostaga Bud-bud, maadaama Kooxda Al Shabaab ay doonayaan inay galaan halkaasi.
Warar hoose ayaa waxa ay sheegayaan in Ciidamadaasi uu hogaaminayo Afhayeenka
Ciidamada Al Shabaab Sheekh C/casiis Abuu Muscab kuwaasi oo la tilmaamay in u
jeedkoodu uu yahay inay u gudbaan deegaannada maamulka Puntland si ay falal
ammaan darri ugu gaystaan.
Hadalka kasoo baxay Maamulka Galmudug ayaa waxa uu imanaayaa xilli inta badan
shacabka Mudug ay hadal hayeen in deegaanno ka tirsn gobolkasi ay galeen Ciidamo
ka tirsan Al Shabaab iyo Saraakiil hoggaaminaysa oo doonaya inay abuuraan falal
ammaan darri.
HOME
|
